L' Bracun da Brach da La Pli de Marô
conosciü da düć y dant y daò
- ći lotrun ch' al foa y gran malandrët! -,
vëgn sö dai Pontać vers Côl Maladët.
Ch'l signur da Coz ia San Linert
cola cherstiana dl Brach á abü n bastert;
y per chëst la pilicia i oréssel concè.
Sö dal Ost da Corvara él sigü d' l' ciatè.
Al n' á bria d' aspetè con sü lotri alalungia;
ai s'infi[l]za düć canć un al ater bel dlungia.
Ai sfodra rabiusc sciöco l' diao śëgn les śables,
se tira d' barest sura fora ales sciables.
L' Pontać da Coz á la lancia tres fòra
y dant y daò i va l' sanch in malora.
Al mör, mo tla bega al ne sëint ch' al é mort,
mo scraia y comana y se para tres fort.
Y insciö alalungia l' éssel ël desmenada,
ne i éssal l' Bracun scrit na lëtra per strada
ch' ess dit for di dënz bel tler a Scior Tita
ch' al sî mort bel' plö ores, ch'al ne sî plö in vita.
Y spo ch' al áa lit chëla burta scritüra,
bëgn i éla passada d' fá vera 'ndertüra.
Al sëint ch' al é mort y toma söl cü:
mervöia tan grana ne uns' mai odü!