Te doo sti fazzolett
per sugatt i oggitt
in sta brutta giornada
o, per dì mej, in sta brutta mattina,
che, deventand sposina,
te devet bandonà
i fradėj, e la mamma, e el tò papà.
Ho ditt «brutta mattina»
ma per modo de dì!
Ghè nient de brutt quand che se va a marì!
L'è minga el sogn più bell
de tutti i tosanell
quell de fa spos?... El cœur,
per bio, alter nol vœur!
Sì, piangen i sposinn;... ma hin lagrimett
spremuu, chissà, da on poo de commozion!...
L'è on piang senza magon!
Eh, quanti volt, in d'on bell ciel d'estaa,
passa come di nìvoj sparpajaa!...
Sora i strad polverent
vegn quatter gott... e el sò l'è sbarlusent!
In l'istess temp el ciel el piang e el rid!...
I sposinn hin inscì!... Parli polid?