Haec tibi Pannonicis, epigrammata mittit, ab oris,
inter Hyperboreas, maximus Ister, aquas.
nec te mirari nimium, Galeotte, decebit,
esse videbuntur vix mea, si qua tibi.
scilicet ingenio multum locus addit et aufert,
inter et est sub quo sidere carmen eat.
in Latiis, scripsi fortasse Latinius, oris,
at nunc barbarico, barbara, in orbe crepo.
hic Maro ponatur; fiet lyra rauca Maronis,
huc Cicero veniat, mutus erit Cicero.
tu tamen haec poteris tali deducere lima,
vel critici ut medio nata Helicone putent.