Par les portes des yeulx et des oreilles,
Que chascun doit bien saigement garder,
Plaisir mondain va et vient, sans cesser,
Et raporte de diverses merveilles.
Pour ce, mon cueur, s'a raison te conseilles.
Ne le laisses point devers toy entrer.
Par les portes, etc.
Que chascun, etc.
A celle fin que par lui ne t'esveilles,
Veu qu'il te fault desormais reposer,
Dy lui: Va t'en, sans jamais retourner,
Ne revien plus, car en vain te traveilles.
Par les portes, etc.