(Responce par Orléans.)
Chascune vieille son dueil plaint;
Vous cuidez que vostre mal passe
Tout autre; mais ja ne parlasse
Du mien, se n'y feusse contraint.
Saichiez de voir qu'il n'est pas faint,
Le tourment que mon cueur enlasse.
Chascune vieille, etc.
Vous cuidez, etc.
Ma peine pers comme fait maint,
Et contre Fortune je chasse;
Desespoir de pis me menasse,
Je sens où mon pourpoint m'estraint.
Chascune vieille, etc.