(Le conte de Clermont.)
Le truchement de ma pensée,
Qui de longtemps est commencée,
Va devers vous, pour exposer
Ce que de bouche proposer
N'oze, craignant d'estre tancée.
Combien que chose n'a pensée,
Dont deust estre desavancée,
Comme au long vous pourra gloser.
Le truchement, etc.
Qui de long, etc.
Va devers, etc.
Si soit par vous recompensée,
Et selon son cas avancée,
Pour mieulx se povoir disposer;
Car plus ne pourra reposer,
Jusques sa joye ait prononcée.
Le truchement, etc.