Tant sont les yeulx de mon cueur endormiz
En nonchaloir, qu'ouvrir ne les pourroye;
Pour ce, parler de beaulté n'oseroye,
Pour le present, comme j'ay fait jadiz.
Par cueur retiens ce que j'en ay apris,
Car plus ne scay lire ou livre de joye,
Tant sont, etc.
En nonchaloir, etc.
Chascun diroit qu'entre les rassotiz,
Comme aveugle des couleurs jugeroye,
Taire m'en vueil, rien n'y voy, Dieu y voye!
Plaisans regars n'ont plus en moy logis.
Tant sont, etc.