(Gilles des Ourmes.)
Dedans l'abisme de douleur
Sont tourmentés par grand foleur
Maints cueurs, par faulte de secours,
Qui n'ont à personne recours,
Qu'à Pitié qui detient le leur.
Car, quant ilz ont servy, on leur
Taille la broche sans couleur;
Lors ilz s'en vont languir le cours
Dedans, etc.
Sont, etc.
Par Dieu ! c'est faulte de valeur
A ceulx qui le font par chaleur,
Et de fait, les tiennent si cours,
Qu'il leur fault user tout le cours
De leur vie, en paine et maleur.
Dedans, etc.