Pour tous voz maulx d'amours guerir,
Prenez la fleur de Souvenir
Avec le just d'une ancollie,
Et n'obliez pas la soussie,
Et meslez tout en Desplaisir.
L'erbe de loing de son Desir,
Poire d'Angoisse pour refreschir,
Vous envoye Dieu, de vostre amye.
Pour tous, etc.
Pouldre de Plains pour adoulcir,
Feille d'aultre que vous choisir,
Et racine de Jalousie,
Et de tretout la plus partie
Mectes au cueur, avant dormir.
Pour tous, etc.