(Anthoine de Guise.)
Ou val obscur, avantureux,
Où les loyaulx cueurs doloreux
Des amoureux
Sont condempnez d'user leurs jours,
En piteux plains et grans clamours,
Me tient Amours,
Comme le chief des langoureux.
Et faut qu'avec les maleureux,
Par son faux refus rigoureux,
Plus que poureux,
J'actende la mort à secours.
Ou val obscur, etc.
C'est le hault guerdon dangereux,
Ordonné pour moy et pour eulx,
Peu savoureux,
Sans autre part avoir recours;
Et la voyant nostre decours.
De criz et plours,
Faisons ung tresor plaintureux.
Ou val obscur, etc.