(Simonnet Caillau.)
Pour bref telz maulx d'amours guerir,
Esgrun de Dueil te fault fuyr,
Les poix au veau te sont contraires,
Quant les fleurs de plaisans viaires
Sont dedans mises au boillir.
L'oubliete te peut servir,
Et l'herbe de Nonsouvenir,
A faire bons electuaires.
Pour bref, etc.
Du triacle de Repentir,
Pour tes accez faire faillir,
Prendras sur les appoticaires;
Avecques siropz necessaires,
Faiz en succres de Deppartir.
Pour bref, etc.