Celuy n’eſt pas heureus qui n’a ce qu’il deſire,
Mais bien-heureux celuy qui ne deſire pas
Ce qu’il n’a point : l’vn ſert de gracieus appas
Pour le contentement, & l’autre eſt vn martyre.
Deſirer eſt tourment qui bruſlant nous altere
Et met en paſſion : donc ne deſirer rien
Hors de noſtre pouuoir, viure content du ſien,
Ores qu’il fuſt petit, c’eſt fortune proſpere.
Le deſir d’en auoir pouſſe la nef en proye
Du corſaire, des flots, des roches & des vents :
Le deſir importun aux petits d’eſtre grands,
Hors du commun ſentier bien ſouuent les déuoye.
L’vn pouſſé de l’honneur par flateuſe induſtrie
Deſire ambitieux ſa fortune auancer :
L’autre ſe voyant pauure à fin d’en amaſſer
Trahiſt ſon Dieu, ſon Roy, ſon ſang & ſa patrie.
L’vn pippé du Deſir, ſeulement pour l’envie
Qu’il a de ſe gorger de quelque faux plaiſir,
En fin ne gaigne rien qu’vn faſcheux deſplaiſir,
Perdant ſon heur, ſon temps, & bien ſouuent la vie.
L’vn pour ſe faire grand & redorer l’image
A ſa triſte fortune, eſpoind de ceſte ardeur,
Soupire apres vn vent qui le plonge en erreur.
Car le Deſir n’eſt rien qu’vn perilleux orage.
L’autre eſclave d’Amour deſirant l’auantage
Qu’on eſpere en tirer, n’embraſſant que le vent,
Loyer de ſes travaux, eſt payé bien ſouuent
D’vn refus, d’vn dédain, & d’vn mauuais viſage.
L’vn plein d’ambition deſireux de pareſtre,
Favorit de ſon Roy, recherchant ſon bon-heur,
Auançant ſa fortune, auance ſon malheur,
Pour auoir trop ſondé le ſecret de ſon maiſtre.
Deſirer eſt vn mal, qui vain nous enſorcelle :
C’eſt heur que de iouïr, & non pas d’eſperer :
Embraſſer l’incertain, & touſiours deſirer
Eſt vne paſſion qui nous met en ceruelle.
Bref le deſir n’eſt rien qu’ombre & que pur menſonge
Qui trauaille nos ſens d’vn charme ambitieux,
Nous déguiſant le faux pour le vray, qui nos yeux
Va trompant tout ainſi que l’image d’vn ſonge.