Volez oïr une grant fable
Qu’il avint l’autrier ſus la table
Au bon roi qui ot non Phelippe,
Qui volentiers moilloit ſa pipe
Du bon vin qui eſtoit du blanc.
Il le ſenti gentil & franc,
Si le clamoit ſon ameor.
Por le bien & por la douçor
Que li vins avoit dedenz ſoi,
Li rois en but ſanz avoir foi.
Li rois qui eſt cortois & ſages
Manda a treſtoz ſes meſſages
Qu’il alaiſſent le meillor querre
Qu’il trovaiſſent en nule terre.
Premiers manda le vin de Cypre,
Ce n’eſtoit pas cervoiſe d’Ypre,
Vin d’Auſſai & de la Mouſſele,
Vin d’Auni & de la Rocele,
De Saintes & de Tailleborc,
De Melans & de Treneborc,
Vin de Palme, vin de Pleſence,
Vin d’Eſpaingne, vin de Provence,
De Montpellier & de Nerbone,
De Bediers & de Quarquaſſone,
De Moſſac, de Saint-Melyon,
Vin d’Orchiſe & de Saint-Yon,
Vin d’Orliens & vin de Jargueil,
Vin de Meulent, vin d’Argentueil,
Vin de Soiſſons, vin d’Auviler,
Vin d’Eſpernai le Bacheler,
Vin de Sezane & de Samois,
Vin d’Anjou & de Gaſtinois,
D’Yſoudun, de Chaſtel Raoul
Et vins de Trie la Bardoul,
Vin de Nevers, vin de Sancerre,
Vin de Verdelai, vin d’Auçuerre,
De Tornierre & de Flavingni,
De S. Porchain, de Savingni,
Vin de Chablies & de Biaune,
.j. vin qui n’eſt mie trop jaune ;
Plus eſt vert que corne de buef.
Toz les autres ne prise .j. oef.
Treſtuit vindrent en .j. conroi
Seur la table devant le roi.
Si comme Diex parla au cigne,
Chaſcuns des vins ſe fiſt plus digne
Par ſa bonté, par ſa poiſſance,
D’abevrer bien le roi de France.
Un preſtre Englois ſi priſt s’eſtole,
Qui moult avoit la teſte fole,
S’eſcommenia dant Mauvais
Qui eſtoit du clos de Biauvais,
Et dant Petart de Chaalons
Qui le ventre enfle & les talons,
Et meſire Rogel d’Eſtampes
Qui amaine les goutes crampes ;
Cil troi vin amainent la roingne.
A grant honte & a grant vergoingne,
Batant, ferant d’un baſton cort,
Les cacha li preſtres de cort
Et lor diſt que jamès n’entraiſſent
La ou nul preudomme hantaiſſent.
Les .ij. vins & de Biauvoiſins
Et dans Clermons li tiers voiſins,
Ces .iij. vin n’en chaça il pas
Qu’il les ſenti de bon compas.
Li vin commun, li vin moien
N’erent priſié un pois baien.
Vin du Mans, de Tors retornerent
Por ce qu’a eſté s’atornerent
Por la paor du preſtre Englois
Qui n’ot cure de lor jenglois.
Vin d’Argenches, Chambeli, Renes
S’en fuirent tornant lor reſnes,
Quar ſe li preſtres les veïſt,
Je croi bien qu’il les oceïſt.
Primes parla vins d’Argentueil
Qui fu clers comme lerme d’ueil,
Et diſt qu’il valoit miex d’aus toz.
« Or te tais, filz a putain glouz, »
Ce diſt li vins de Pierre frite,
« Tu jeues a la deſconfite ;
« Ices trives seront enfretes ;
« Je vail moult miex que vous ne fetes,
« A teſmoing le vin de Marli,
« De Duoeil, de Monmorenci.
Lors dist bée ſanc Dé Meulent :
« Argentueil, je ſui moult dolent
« Que tu deſpis tes compaignons.
« Saches de voir nous en plaignons,
« Qui fez d’Auçuerre, de Soiſſons
« Le vin de Laon, de Tausons,
« Icil dui paſſent Vermendois,
« Cil doivent bien seoir au dois. »
Eſparnais diſt a Auviler :
« Argentueil, trop veus aviler
« Treſtoz les vins de ceſte table ;
« Par Dieu trop t’es fez conneſtable.
« Nous paſſons Chaalons & Rains,
« Nous oſtons la goute des rains,
« Nous eſtaignons toutes les ſois. »
Dont saut en piez le vin d’Auſois,
Li bons gentiz vins et roiaus :
« Eſparnai, trop es deſloiaus !
« Tu n’as droit de parler en cort.
« Je ſui cil qui la gent ſecort ;
« Entre moi et ma damoiſele
« Longue tonne de la Moſele,
« Nous ſecorons les Alemanz,
« Nous feſons treſtoz noz commanz ;
« Aux Coloingnois prenons l’argent
« Dont nous repeſſons nostre gent. »
Lors diſt li vins de la Rocele :
« Vous, Auſſai, & vous, la Mouſele,
« Se vous paiſſiez cele gent herre,
« Je repais treſtoute Engleterre,
« Bretons, Normans, Flamens, Galois,
« Et les Eſcos et les Irois
« Norois & cels de Danemarche ;
« Juſques la dure bien ma marche ;
« Je ſui des vins li ſebelins,
« J’en aport toz les eſterlins. »
Li vins S. Jehan d’Angeli
Si diſt a Henri d’Andeli
Qu’il li avoit crevé les ex
Par ſa force, tant eſtoit prex.
Engoleſme, Bordiaus & Saintes,
Cil i firent bien lor empaintes ;
Et li bons vins blancs de Poitiers
Qui n’a cure de charretiers ;
C’eſt cil qui toute gent acroche
Par la froidure de ſa roche ;
Tant eſt fort que par ſon orgueil
Se fet coſtoier au ſoleil.
Ne ſai qui en but plus qu’aſſez,
Par qoi il ot les iex quaſſez.
Chauveni, Montrichart, Laçoy,
Chaſtel Raoul et Beſançoi,
Monmorillon & Yſoudun
Furent devant le roi tot un
Por abatre le bobançois
De treſtos nos bons vins françois.
Vin françois bien ſe deſſendoient
Et cortoiſement reſpondoient :
« Se vous eſtes plus fort de nous,
« Nous ſommes fade, ſavorous ;
« Si ne feſons nule tempeſte
« A cuer, n’a corz, n’a oeil, n’a teſte.
« Mès Vermentun, S. Brice, Auçuerre,
« Si font les genz geſir au ſuerre. »
Qui la veïſt vins eſtriver,
Et chaſcun ſa force aviver,
Et chaſcun mener ſon deſroi
Sor la table devant le roi,
Ce n’eſt ore ne plus ne mains
Se vins eüſſent piez ne mains,
Je ſai bien qu’il s’entretuaiſſent,
Ja por le bon Roi nel leſſaiſſent.
Qui veïſt comment eſtrivoient,
Et com li vin eſtinceloient,
Si que la grans ſale & la chambre
Sambloit plaine de baſme & d’ambre.
Ce ſambloit paradis terreſtre ;
Chaſcuns lechierre i vousiſt eſtre.
Chevaliers, clers, borgois, chanoine,
Contrait, muel, meſel & moine,
S’il hurtaiſſent a tel quintaine,
Jamès n’eüſſent la quartaine.
Li rois du blanc bien ſe paia
Et chaſcun des vins eſſaia.
Li preſtres Englois les jugoit
Qui volentiers les engorgoit,
Et a chaſcun donoit .j. bout,
Et puis ſi disoit : « Iſe gout ;
« Bi S. Thomas qui fu martin,
« Goditouet, ci a bon vin. »
Treſtoz ſeul lut cele leçon ;
Guerſoi drinçoi fu ſon clerçon.
S’eſcommenïa la cervoiſe
Qui eſtoit fete dela Oiſe,
En Flandres & en Engleterre,
Puis geta la chandeille a terre,
Et puis ſi ala ſommeillier
.iij. nuis, .iij. jors ſanz eſveillier.
Li rois les bons vins corona
Et a chaſcun ſon non dona.
Vin de Cypre fiſt apoſtoile
Qui reſplendist comme une eſtoile ;
Dont fiſt chardonal & legat
Du bon gentil vin d’Aquilat ;
Puis fiſt .iij. rois & puis .iij. contes,
Et puis en dura tant li contes
Qu’il en fiſt .xij. pers en France
Ou li rois out moult grant fiance.
Qui .j. des pers porroit avoir,
Ne por argent ne por avoir,
Deſor ſa table a ſon mengier,
Moult s’i feroit bon arengier ;
Jamès maladie n’auroit
Jusques au jor que il morroit.
Qui miex ne puet, ſi n’a pas tort,
Adès o ſa vielle ſe dort.
Soit vin moien, per ou perſone,
Prenons tel vin que Diex nous done.