Saichent presens et avenir,
Que nous, Amours, par franc desir
Conseillez, sans nulle contraincte,
Apres qu'avons oy la plainte
De CHARLES LE DUC D'ORLÉANS
Qui a esté, par plusieurs ans,
Nostre vray loyal serviteur
Rebaillé lui avons son cueur
Qu'il nous bailla, pieca, en gaige,
Et le serment, foy et hommaige,
Qu'il nous devoit quictié avons,
Et par ces presentes quictons;
Oultre plus, faisons assavoir,
Et certiffions, pour tout voir,
Pour estoupper aux mesdisans
La bouche, qui trop sont nuisans,
Qu'il ne part de nostre service
Par deffaulte, forfait ou vice,
Mais seulement la cause est telle:
Vray est que la Mort trop cruelle
A tort lui est venu oster
Celle que tant souloit amer,
Qui estoit sa Dame et maistresse,
S'amie, son bien, sa leesse;
Et pour sa loyaulté garder,
Il veult desormais ressembler
A la loyalle turterelle
Qui seule se tient, à par elle,
Apres qu'elle a perdu son per;
Si lui avons voulu donner
Congié du tout de soy retraire
Hors de nostre court, sans forfaire.
Fait par bon conseil et advis
De nos subgietz et vraiz amis,
En nostre present Parlement
Que nous tenons nouvellement;
En tesmoing de ce, avons mis
Nostre scel, plaqué et assis,
En ceste presente quictance,
Escripte par nostre ordonnance,
Presens mains notables recors,
Le jour de la feste des morts,
L'an mil quatre cent trente et sept,
Ou chastel de Plaisant recept.