Faictes pour moy com j'ay pour vous,
Retenez moy, par dessus tous,
Amy tout seul, tres belle Dame,
Je vous jure sur Dieu, sur m'ame,
Ne vueil servir autre que vous.
Faictes pour moy, etc.
Guerrissez moy du mal d'Amours,
Et me donnez du bien de vous;
Reconfort tel plus ne m'en chaille,
Mon bien, m'amour, mon fin cueur doulx,
A vous me rens, à vous suis tous.
Faictes pour moy, etc.
Je vous ayme plus que autre femme,
N'autre que vous n'aura la garde,
Helas! de moy qui suy à vous.
Faictes pour moy, etc.
LE LAY PITEUX.
Bonne saison, bon temps avoye,
Helas! amy, quant vous veoye,
Reconfort bon en vous prenoye;
Tant de plaisir et d'autre bien
Rejoissoit ma seule joye,
A vo vouloir me soubzmectoye,
Nul autre bien ne demandoye,
Dessoubz les cieulx pour estre mien,
Que vostre amour qui tant amoye,
En vous servant me delictoye,
Et pourquoy moult seur estoye
Que vous m'amiez tres loyaument;
Et quant jadiz vous requeroye
Que vo servant estre vouloye,
Mon seul vouloir vous appelloye,
Et mon vaillant entierement.
Vous me dictes si doulcement,
En moy baisant et accollant,
Amy, amons nous chierement,
Baille ton cueur, et prens le mien;
Et je changay joyeusement,
Et vous aussi si liement,
Et feismes loyal serment
Qu'avons tenu, je le scay bien.
Et est vray qu'oncques crestien
En amours n'eust autant de bien,
Gardant vostre honneur et le mien,
Que j'ay eu, et sans avoir blasme,
Vo doulx acueil, vo doulx maintien.
Vostre plaisir, que fust le mien,
Car sans cellui, ne m'estoit rien,
Je le jure sur Dieu, sur m'ame.
Si vous baillay le mien en garde,
Belle Dame,
Prenant charge
De vous loyaument servir,
Sans reprouche, ne diffame,
Sur mon arme,
Sans jamais de vous partir.
Helas! quant d'elle partoye,
Je pensoye
Quant pourroye
Bientost vers elle venir,
Nuit et jour je la sonjoye,
La veoye parler, aler et venir;
Tant espris d'elle estoye,
Qu'en veillant je l'appelloye,
Puis que bien loing en estoye,
A soy cuidoye parler;
Mais puis bien apres veoye
Que resvoye,
Me prenoye à plourer.
Cest dueil m'estoit à porter,
Et bien aise endurer,
Car bientost, du retourner
Me prenoit tres grant talent;
En elle si fort penser,
Ma joye renouveller
Me faisoit incontinent.
Et quant venir n'y povoye,
Entre deux lui rescripvoye,
Son nom et le mien mectoye
Escript bien estrangement;
Et puis quant je la veoye,
Dieu scet quel chiere j'avoye
Recueilly joyeusement.
Puis nous faillu esloingner
L'un de l'autre, guermenter,
Car dangier,
Plusieurs autres mesdisans
Nous firent tant endurer,
Et plourer,
Tourmenter,
Oncques puis n'eusmes bon temps
Et puis entre autre gent
Failloit, en nous esloingnant,
A plusieurs autres parler,
Avoir autre pensement,
Muer la couleur souvent,
Sans l'un l'autre regarder.
Helas! elle s'esbatoit,
Et bonne chiere faisoit
A tous autres, fors qu'à moy,
Dont mon cueur fort souspiroit,
Quant elle me regardoit,
Je vous jure par ma foy.
Dont sourdit grant jalousie,
Car elle ne creoit mye
Que n'eusse fait autre amye;
Ainsi me sembloit il d'elle,
Que s'amour me fust faillie,
Departie,
Et guerpie,
M'eust laissié la bonne belle.
Dont ensiues grant querelle;
Moy et elle,
Advint qu'en une chappelle
Nous nous trouvasmes tous deux,
Et je lui dis: Bonne et belle,
Ne me soiez si cruelle,
Puisque nous sommes tous seulz.
Dictes moy vostre vouloir,
Ne me vueillez decevoir,
Ne mectre à nonchaloir;
Car, vers vous, n'ay rien forfait.
Mon amy, vueillez savoir,
Vous me feistes trop douloir,
Ne savez vous comment il m'est?
Vous m'avez abandonnée
Et laissiée,
Desolée,
Esloingnée;
A qui oseray je dire
Ma tres dolente pensée
Qui grevée
M'a, et trestant mal menée
Que je vis en grant martire.
N'est riens qui me puist souffire,
Tant ay d'ire;
Quant les autres vous voy rire,
Et grant joye demener,
Je ne vueil avoir nul mire
Qui me mire,
J'ayme mieux mes jours finer.
Et lors nous nous advisames,
Et l'un l'autre pardonnasmes,
Car pour obvier mains blasmes,
Il nous faillut eslongner;
Noz amours renouvellasmes,
Et de nouvel, nous jurasmes
De nous loyaument amer.
Cecy nous dura long temps,
On dit qu'au bout de sept ans,
Revient voulentiers mal ans
Ainsi m'est il advenu,
Dont je vis piteusement,
En tourment,
Las! je suis pis que perdu.
Helas! tres cruelle mort,
Tu me fais crier à tort
A la mort,
Que ma mort
Bonnement ne l'ose dire
Mon confort,
Ma joye et mon deport.
Or me fault passer du port
Du royaulme en l'empire
De tout plaisir, en tristesse,
Mectre mon cueur en destresse
Qui me blesse,
Et ne cesse
De destruire ma jeunesse,
Puis que m'as mort ma maistresse.
Dont liesse
Si me blesse,
Helas! qu'esse
Qui me presse
De dire las! que feray?
Que diray? où iray?
Si mourray,
Ou si de dueil creveray,
Car je n'ay que esmay
Helas! et où me mectray
Jusques mes jours fineray!
En lieu ne reposeray
Jusque là où la verray.
Car pour ce que tant l'aymay,
Tous les jours souhaiteray
La mort qui desja m'aprouche,
Entre deux je ne vouldroye
Estre en lieu où eust joye,
Com souloye,
Car ma douleur doubleroit.
Veoir ce qu'avoir souloye,
Helas! car mieulx ameroye
M'enfouir où que que soit,
Disant adieu tres douloureux,
Adieu, adieu tous amoureux,
Adieu le plaisir de mes yeulx,
Adieu, sans plus estre joyeulx.
Adieu le bien de tous les lieux,
Adieu le mien dessoubz les cieux,
Adieu regard tres gracieux,
J'en preing congié de cueur piteux;
Si fineray ma complainte,
Ma joye sera actainte,
Et de douleur auray mainte.
Grant actainte
Dont il me convient languir,
Et sevir,
Car j'ay aymé, et sans fainte,
Celle qu'avoye tant crainte,
Que pour elle vueil mourir.
Sa tres bonne renommée,
Sa grace de tous louée,
Et de beauté aournée,
Tant amée et prisée,
Desirée
De tres toute autre gent,
La fait estre regrectée,
Dont ay la mort demandée,
Toute joye oubliée,
A Dieu son ame command.
Et saichiez certainemment
Trestous li leal amant,
J'en dis tant,
Sans nulle dame blasmer,
Que c'estoit la plus plaisant
Des belles, et avenant,
Com peut des yeulz regarder.
C'est le reconfortement
Que j'ay en mes jours finant,
En priant humblement
A Dieu, tres devotement,
Qu'en son Paradis briefment
Son ame puisse trouver.
Sans vous veoir,
Pres du manoir,
Amy de vous,
Fine mes jours
Cest derrain soir,
Veuillez savoir
Qu'à nonchaloir
Mis par vous tous.
Sans vous, etc.
Mourant espoir
Ferez devoir,
Souviengne vous
Que laissay tous,
Par vous vouloir.
Sans vous, etc
Faulce mort,
A grant tort,
M'as grevée,
Et ostée
Mon deport;
Mon cueur mort,
Car trop fort
L'as serré.
Faulce, etc.
Pres du bort
Du mal port
M'as laissiée
Desolée,
Sans confort.
Faulce, etc.