Ou regard de voz beaulx, doulx yeulx,
Dont loing suis par les envieux,
Me souhaide si tres souvent,
Que mon penser est seulement
En vostre gent corps gracieux.
Savez pourquoy, mon bien joyeulx,
Celle du monde qu'ayme mieulx
De loyal cueur, sans changement?
Ou regart, etc.
Dont loing, etc.
Me souhaide, etc.
Pour ce que vers moy en tous lieux
J'ay trouvé plaisir ennuieux,
Trop fort puis le departement
Que de vous fis derrainnement,
A regret merencolieux.
Ou regart, etc.