Ma seule amour, ma joye et ma maistresse,
Puisqu'il me fault loing de vous demourer,
Je n'ay plus riens à me reconforter,
Qu'un souvenir pour retenir lyesse.
En allegant, par espoir, ma destresse,
Me conviendra le temps ainsi passer.
Ma seule, etc.
Puisqu'il, etc.
Car mon las cueur, bien garny de tristesse,
S'en est voulu avecques vous aler,
Ne je ne puis jamais le recouvrer,
Jusques verray vostre belle jeunesse.
Ma seule, etc.