Ne hurtez plus à l'uis de ma pensée,
Soing et Soucy, sans tant vous traveiller,
Car elle dort, et ne veult s'esveiller,
Toute la nuit en paine a despensée.
En dangier est, s'elle n'est bien pensée,
Cessez, cessez, laissez la sommeiller.
Ne hurtez plus, etc.
Soing et soussy, etc.
Pour la guerir Bon espoir a pensée
Medicine qu'a fait appareiller;
Lever ne peut son chief de l'oreiller,
Tant qu'en repos se soit recompensée.
Ne hurtez plus, etc.