C’est faussement qu’on estime
Qu’il ne soit point de beautez
Où ne se treuve le crime
De se plaire aux nouveautez.
Si Madame avoit envie
D’aimer des objets divers,
Seroit-elle pas suivie
Des yeux de tout l’univers ?
Est-il courage si brave
Qui pust avecque raison
Fuir d’estre son esclave
Et de vivre en sa prison ?
Toutesfois cette belle ame,
A qui l’honneur sert de loy,
Ne hait rien tant que le blasme
D’aimer un autre que moy.
Tous ces charmes de langage
Dont on s’offre à la servir,
Me l’asseurent davantage,
Au lieu de me la ravir.
Aussi ma gloire est si grande
D’un trésor si précieux
Que je ne sçay quelle offrande
M’en peut acquitter aux cieux.
Tout le soin qui me demeure
N’est que d’obtenir du sort
Que ce qu’elle est à cette heure
Elle soit jusqu’à la mort.
De moy, c’est, chose sans doute
Que l’astre qui fait les jours
Luira dans une autre voûte
Quand j’auray d’autres amours