At true Luve's bidding, wilt thou gae,
To yonder holme sae lee, lassie,
Whare Avon wimples roun' the brae,
And live wi' luve and me, lassie?
I canna gang, I darena gang,
I'm rede o' luve and thee, laddie;
My Minnie's gear is a' gane wrang,
She downa tocher me, laddie.
The diamonds in thy bonny een,
Are wealth eneuch for me, lassie,
And Grandeur, busked in silken sheen,
Shall envy you and me, lassie.
My een subdued by passing years,
For gowd ye'd gladly gie, laddie,
And let their diamonds melt in tears,
For loss o' luve and thee, laddie.
Tho' gowd the greedy packman guides,
It ne'er had weight wi' me, lassie;
In nature's glen, whare pleasance bides,
Frae thoughts o' pelf we're free, lassie.
O! lead me to your leesome bour,
Whare Avon glides sae fine, laddie,
And lang may Luve appreive the hour,
That links my fate to thine, laddie.