Sum ƿoruld-cempa ƿæs þe ƿolde munuc beon · 1066
⁊ on godes ge-laðunge alede his ƿæpna ·
⁊ to munuc-life æt-foran mannum gecyrde ·
⁊ him cytan arærde · on sumere digelnysse ·
sƿylce he ancer-setla eaðe beon mihte ·
⁊ martin᷒ hæfde ge-hadod his ge-beddan
on mynecena life on sumū mynstre ·
Þa besende se deofol sƿilc geþanc on þone munuc 1073
þæt he ƿolde habban his ƿif him to geferan ·
⁊ he ferde to martine · ⁊ his mod him geopenode ·
Þa cƿ̅ se halga ƿer þæt hit unþæs-lic ƿære · 1076
þæt þæt ƿif sceolde ƿunian eft mid him ·
siððan he munuc ƿæs · ⁊ forƿyrnde him þæs ·
He sƿa-þeah þurh-ƿunode on his anƿilnysse · 1079
⁊ cƿ̅ þæt hit ne sceolde his munuc-hade derian
þeah þe he hire frofres ⁊ fultumes bruce ·
þæt he eft nolde ge-cyrran to his earrū leahtrū ·
Þa þa he lange þurh-ƿunode on þære anƿilnysse · 1083
þa cƿ̅ se halga ƿer to þā hohfullan munece ·
Sege me ic þe axige gif þu æfre ƿære 1085
oððe on ge-feohte oþþe on ænigum truman? [sic @ Skeat]
He cƿ̅ þæt he ƿære | ƿitodlice for-oft 1087
ægþer ge on truman ge eac on ge-feohte ·
Martin᷒ þa cƿ̅ to þam munece eft · 1089
Ge-saƿe þu ænig ƿif þa ðu ƿære on gefeohte 1090
feohtan forð mid eoƿ atogenum [sic @ Skeat] sƿurde? [sic @ Skeat]
Þa scamode þā munece · ⁊ he sƿiðe þancode 1092
þæt he mid ge-sceade ofer-sƿyðed ƿæs ·
⁊ þæt he his ge-dƿylde ne moste · for martyne folgian ·
Se halga ƿer þa cƿ̅ · ƿíf ne sceal na faran 1095
to ƿera fyrd-ƿicum · ac ƿunian æt ham ·
for-seƿenlic biþ þæt ƿerod þæt ƿíf-menn feohtað ·
feohte se cempa on fyrdlicū truman ·
⁊ ƿíf hi ge-healde binnan ƿealle trymmincge ·
⁊ heo hæfð hire ƿuldor gif heo hylt hire clænnysse
bæftan hire ƿere · ⁊ þæt biþ hire miht ·
⁊ ge-fylled sige þæt heo ge-seƿen ne beo ute ·