Arborius ƿæs gehaten sum heah-þegen on þā lande · 0574
sƿiðe geleafful man · ⁊ his dohtor læg on fefore
þearle ge-brocod · þa brohte man sume dæg
an ærend-geƿrit to þā ylcan þegene
frā þam bisceope martine · ⁊ he hit lede on hire breoste
ða þa hire hatost ƿæs ⁊ heo ƿearð hal sona ·
Þa ƿearð se fæder sƿa onbryrd · þæt he sona be-hét 0580
gode hire mægþ-hád ⁊ hi to martine brohte ·
þæt he his agene mihte on þā mædene oncneoƿe ·
ne he eac nolde þæt anig oðer man sceolde
hire hád on sættan · butan se halga martinus ·
Sum ƿer hatte paulin᷒ þe ƿel þeah on gode syððan · 0585
þa ƿurdon his eagan yfele ge-hefegode ·
mid tosƿollenū breaƿū · ⁊ sƿið-licum myste
sƿa þæt his seon sƿyðe þeostrodon ·
þa hrepode martinus mid anre sƿingan ·
⁊ eall seo sarnis him sona fram geƿat ·
⁊ se mist samod þurh martines hrepunge ·
He ƿæs sƿiðe ƿelig man · ac he ƿearð sƿa onbryrd 0592
þæt he ealle his æhta endemes beceapode ·
⁊ dælde eall þearfū | for his drihtnes lufon ·
Þa herode martin᷒ þæs mannes dæda sƿyðe · 0595
⁊ oþrū to bysne sealde oft secgende be him ·
þæt he on þam timan gefylde fægere þone cƿyde ·
þe ure drihten cƿ̅ to sumum rican men ·
far ⁊ syle ealle þine æhta · ⁊ dæl þæt ƿurð þearfum ·
þonne hæfst þu gold-hord on heofonan rice ·