html.skin-theme-clientpref-night @media(prefers-color-scheme:dark){html.skin-theme-clientpref-os }Ingeniosa Viris contingunt Nomina magnis,
Ut dubites Casu vel Ratione data.
Nam Sors, cæca licet, tamen est præsaga futuri;
Et sub fatidico Nomine vera premit.
Et Tu, cui soli voluit Respublica credi,
Fœdera seu Belgis seu nova Bella feras;
Haud frustra cecidit tibi Compellatio fallax,
Ast scriptum ancipiti Nomine Munus erat;
Scilicet hoc Martis, sed Pacis Nuntius illo:
Clavibus his Jani ferrea Claustra regis.
Non opus Arcanos Chartis committere Sensus,
Et varia licitos condere Fraude Dolos.
Tu quoque si taceas tamen est Legatio Nomen
Et velut in Scytale publica verba refert.
Vultis Oliverum, Batavi, Sanctumve Johannem?
Antiochus gyro non breviore stetit.