Wol mich dirre stunde·
die solde ich enpfahen·
mit gesange es ist rehte an der zit·
ob ich dc wol kvnde·
dar so solde ich gahen·
wan hoͤret vogel singen widerstrit·
dar zv̊ dringent dur dc gras·
blůmen manger leie·
ich kan selbe da dc wc·
willekome her meýe·
mir vnd ǒch der frǒwen min·
ich wil sin·
swie so si gebútet mins herzen troͤsterin·
Herzelieber mere·
der warte ich vil dike·
von der mineklichen frowen min·
ich were ane swere·
wan dc ich erschrike·
dvr die lieben trage ich senden pin·
dc ist endeliche war·
liebe nimt die sinne·
liebe machet missevar·
wissent dc ich brinne·
in der liebe als ein glv̊t·
frowe tůt·
wol an mir vil tumben deswar so sit ir guot·
Wer ich niht ein tvmber·
so liesse ich min singen·
sit es ist der lieben gar ein wint·
ich han grossen kvmber·
den mag si wol ringen·
frowe vs senden sorgen mich enbint·
ir svlt mir genedig wesen·
lieb mins herzen wunne·
so mag ich vil wol genesen·
liehtú spilndú svnne·
troͤstent mich vil senden man·
sit ich gan·
iv wol aller eren gedenkent wol daran·
Owe sender sorgen·
swie so ich gebare·
doch tůt si mir an dem herzen we·
die trage ich verborgen·
stille vnd offenbâre·
diene ich ir was wil dú liebe me·
wil si ich singe ir wil si ich sage·
wil si ich trure ich lache·
ich weis wol der lieben klage·
ich diene ir zeswache·
frowe minne fuͤgent dc·
das mir bc·
tů min troͤsterinne der ich noch nie vergas·
Mit zwein blanken armen·
ein vil lieplich twingen·
ist mir sendem knehte wilde gar·
si sol sich erbarmen·
nach den selben dingen·
iamert mich got gebe dc ichs ervar·
tǒgen minne ist mir vnkunt·
lieplich twingen túre·
wil ir rosevarwer mvnt·
so froͤwe ich mich húre·
troͤstent frowe est an der zit·
sorge lit·
mine herzen nahe· des ir gewaltig sit·