Wol mich des tages der mir alrerst ist worden kunt·
was hoher tvgende vnd reiner eren an den frowen lege·
es kom ein wib al mitten in mins herzen grvnt·
da rieten mir die sinne min dc ich ir schone pflege·
dc mich dekeiner slahte not·
von ir trost vnd von ir genaden niemer kvnde gescheiden·
es wendet nieman danne der tot·
ir minneklichen lip den kan mir nieman wol erleiden·
si ist mir liep vnd liebet mir fúr ellú wip·
si ist mir iemer lieber danne min selbes lip·
si ist lieb ane zal dc spriche ich offen bar·
si ist min liehtú rose rot vnd ǒch min spilnder svnne klar·