Wol mich der stunde dc ich sie erkande·
dú mir den lib vnd den mv̊t hat betwungen·
sit dc ich die sinne so gar an sie wande·
des si mich hat mit ir gvͤte verdrungen·
dc ich von ir gescheiden niht enkan·
dc hat ir schoͤne vnd ir gvͤte gemachet·
vnd ir roter mvnt der so lieplichen lachet·
Ich han den mv̊t vnd die sinne gewendet·
an die reinen die lieben die gv̊ten·
dc mv̊s vns beiden wol werden volendet·
swes ich getar in ir hulden gemv̊ten·
swc ich froͤiden zer werlde ie gewan·
dc hat ir schoͤne vnd ir guͤte gemachet·
vnd ir roter mvnt der so lieblichen lachet·