WInter dine truͤben stvnde·
vnd din kelte manigvalt·
ob ich das erwenden kvnde·
dc siv wurden bas gestalt·
das liesse ich dur die langen naht·
vnd durh die vil minneklichen
dú mir froͤiden vil hat braht·
Ich sach die vil minnekliche·
vor mir stan in richer wat·
zehant do wart ich froͤiden riche·
da von min mv̊t vil hohe stat·
mich gruͤste ir minneklicher munt·
der duhte mich in solher roͤte
sam ein fúrig flamme enzunt·
Heý herregot durh dine gvͤte·
růche der minnekliche pflegen·
mit steten trúwen si behuͤte·
vnd sende ir dinen suͤssen segen·
dc hat si verchuldet gar·
wol gegen al der werlte gemeine
eý herre got nv nim ir war·