Was ich nv núwer mere sage·
des darf 101r niemen fragen ich bin niht fro·
die frúnde verdrússet miner klage·
swes man ze vil gehoͤret dem ist alleine also·
nv han ich sin beide schaden vnd spot·
was mir doch leides vnuerdienet dc erkenne got·
vnd ane schulde geschiht·
ich gelige herzeliebe bi
es hat an minen froͤiden nieman niht·
Die hohgemv̊ten zihent mich·
ich minne niht so sere als ich gebare ein wib·
si liegent vnd vnerent sich·
si was mir iegelicher mâsse so der lib·
nv getroste si mir dar vnder nie den mv̊t·
der vngenaden mv̊s ich vnd des si mir noch getůt·
erbeiten als ich mac·
mir ist eteswenne wol geschehen
gewinne aber ich nv niemer gv̊ten tac·
So wol dir wib wie reine din name·
wie senfte dv ze nennen vnd zerkennen bist·
es wart nie niht so rehte lobesame·
da dvs an rehte guͤte kerest so dv bist·
din lob mit rede nieman wol volenden kan·
swes dv mit trúwen pfligest wol im der ist ein selic man·
vnd mac vil gerne leben·
dv gist alder welte hohen mv̊t
maht dv mir ein wenig froͤide geben·
Ich han ein dinc mir fúrgeleit·
dc stritet mit gedanken in dem herzen min·
ob ich ir hohen werdekeit·
mit minem willen wolte lassen minnren sin·
ald ob ich wolte dc si grosser si·
vnd si vil reine selig wib ste min vnd aller manne fri·
si tv̊nt mir beide we
in wirde ir lasters niemer fro verget si aber mich
das klage ich iemer me·
Des einen vnd dekeines me·
wil ich ein meister sin aldie wile ich lebe·
das lob wil ich das mir beste·
vnd mir die kvnst dú werlt gemeine gebe·
dc nieman sin leit so schone kan getragen·
des begêt ein wib an mir dc ich naht noch tac niht kan gedagen·
nv han eht ich so senften mv̊t·
dc ich ir has ze froͤiden nime
owe wie rehte vnsanfte dc mir doch tůt·