Was ich doch gegen der schonen zit·
gedinges vnd wanes han verlorn·
swc kvmbers an dem winter lit·
den wande ich ie des svmers han verborn·
svs saste ich alles besservnge fúr·
swie vil ich trostes ie verlúr·
so hat ich doch zefroͤiden wan·
dar vnder misselang mir ie·
in vant so stete froͤide nie·
si wolte mich ê ich si lan·
Mv̊s ich nv sin nach wane fro·
son heisse ich niht zerehte ein selig man·
dem es sin selde fuͤget so·
dc im sin herze lieb wol gv̊tes gan·
hat ǒch der selbe froͤide richen sin·
des ich vil leider ane bin·
son spotte er niht dar vmbe min·
ob im sin lieb iht liebes tv̊t·
ich were ǒch gerne hohgemv̊t·
moͤht es mit liebes hvlden sin·
Er selig man si selig wib·
der herze ein ander sint mit trúwen bi·
ich wil dc dc ir beider lib·
getúret vnd in hoher wirde si·
vil selig sin ir iar vnd al ir zit·
er ist ǒch selig svnder strit·
der nimt ir tvgende rehte war·
so dc es in sin herze get·
ein selig wib dv́ sich verstet·
dú sende ǒch gv̊ten willen dar·
Sich wenet maniger wol begên·
so dc er gv̊ten wiben niht enlebe·
der tôre kan sich niht versten·
wc es froͤide vnd ganzer wirde gebe·
dem liht gemv̊ten dem ist iemer wol·
mit lihten dingen als es sol·
swer wirde vnd froͤide erwerben wil·
der gediene gv̊tes wibes grůs·
swen si mit willen gruͤssen mv̊s·
der hat mit froͤiden wirde vil·
Ja herre wes gedenket der·
dem vngedinet ie vil wol gelang·
es si ein si es si ein er·
swer also minnen kan der habe vndank·
vnd da bi gv̊ten dienst vber siht·
ein selig wib dv́ tv̊t des niht·
dú merket gv̊tes mannes sitte·
da scheidet si die gv̊ten von·
so ist ein tvmbe so gewon·
dc ir ein tvmber volget mitte·