Wafen ſi geſchꝛijet·
dc der leide winter kalt·
bꝛinget ſoꝛge manicvalt·
kleinē vogelin blv̊men vn̄ ǒch mir·
des bin ich gefrîjet·
voꝛ dien hohſten froͤidē min·
ich wil aber iarlanc ſin·
bi den ſenden wie kůme ich v̾bir·
dc ich die vil gůtē niht ennenne·
ich nenne ſi wenne·
mvgt ir fragē ſa zehant·
iezent ſo wirt ſi genāt·
nein es fuͤget weder mir noch ir·
frowe mache· dc mir ſwache·
leitlich ſache· lache mir vn̄ dir·
ICh wil fúrbas ſingē·
vf genade vn̄ dvr ir zvht·
ſuͤſſe richiv reine fruht·
miner trúwē la genieſſen mich·
dv kanſt ſw̾e ringen·
einer fraget lihte nv·
war vmbe ich dich heiſſe dv·
daſt vō rehter liebe frowe ſpꝛich·
hab ich dar an iend̾ miſſeſpꝛochen·
dc las vngerochē·
wā ich mac des laſſen niht·
ſwc dar vmbe mir geſchiht
als h̾zekliche mīne ich dich·
Frowe mache· dc mir ſwache·
leitlich ſache· lache mir vn̄ dir·
FRowe kúniginne·
vberliep vn̄ vb̾gv̊t·
ſol ich weſen vngemv̊t·
diſen wint̾ vō dien ſchuldē din·
dc nimt mir die ſinne·
dv ſolt dich bedenkē bas·
wā ich din noch nie v̾gas·
mit gedankē in dē h̾zen min·
ich han alles gv̊t vō dir geſvngen·
nv iſts mir niht gelvngē·
da vō ich dir dienē wil·
gar ane ende vn̄ ane zil·
alſe ſtet min liebe hin gegē dir·
Frowe mache· dc mir ſwache·
leitlich ſache· lache mir vn̄ dir·