Wa vunde man sament so manig liet·
man vunde ir niet·
in dem kúnigriche·
als in zúrich an bůchen stat·
des pruͤuet man dike da meister sang·
der Manesse rank·
darnach endeliche·
des er dú liederbůch nu hat·
gegen sim houe mechten nigin die singere·
sin lob hie pruͤuen vnd andirswa·
wan sang hat bǒn· vnd wúrzen da·
vnd wisse er wa·
gůt sang noch were·
er wurbe vil endelich darna·
Sin sun der kuster der treibs ǒch dar·
des si gar·
vil edils sanges
die herren gůt hant zemne bracht·
ir ere pruͤuet man dabi·
wer wîste si·
des aneuanges·
der hat ir eren wol gidacht·
das tet ir sin der richter si nach eren·
das ist ǒch in erborn wol an·
sang da man die frowen wolgetan·
wol mitte kan·
ir lob gemeren·
den wollten si nit lan zergan·
Swem ist mit edlem sange wol·
des herze ist vol·
gar edler sinne·
sang ist ein so gar edles gůt·
er kumt von edlem sinne dar·
dur frowen clar·
dur edil minne·
von dien zwein kumt so hoher můt·
was were dú welt· weren wib nicht so schoͤne·
dur si wirt so vil suͤssekeit·
dur si man wol singet vnde seit·
so gůt geticht·
vnd sůs gedoͤne·
ir wunne sang vs herzen treit·