Vns wil ein svmer komen·
sprach ein magt ia han ich den von rúwental vernomen·
seht den wil ich loben·
min herze spilt vor froͤiden reht alsam es welle toben·
ia hort ich in reien mit den kinden·
ia en wil ich niemer des erwinden·
ich springe an siner hende zv̊ der linden·
IR mv̊ter rief ir nach·
weistv wie geschach
280v diner gespiln Júten· des si bi ir eide mir veriach·
mit einem liede wůhs er ir vf das wempel·
si gewan ein kint bi im dc heisset lempel·
also lert er si den gimpel gempel·
Mv̊ter la das sin·
ia sast er mir ein rosen tschapel vf das hǒbet min·
das het liehten schin·
zwen gemalt kalzen die braht er mir vber rin·
die trage ich noch húte an minem beine·
des er mich bat das weis ich alterseine·
ia volge ich úwer lere harte kleine·
Der mv̊ter der was leit·
dc dv́ tohter niht vernam dc si ir vor seit·
do sprah dú stolze meit·
ich han ims gelopt des hat er min sicherheit·
wc verlúse ich da mit miner eren·
ia wil ich niemer wider keren·
er mv̊s mich sinen trairos leren·