Vns tůt wint̾ ab̾ leide·
vf d̾ wūneklichē heide·
die hat er gemachet val·
manigú ſvͤſſe vogel ſtīme·
twīget er mit ſiner grīme·
dc ſi ſwigent vb̾al·
dc klage ich vn̄ dānoch mere·
dú w̾lt iſt v̾zaget ſo ſere·
dc mā niend̾ vindet froͤidē ſchal·
Was klage ich toꝛe ich tvmb̾·
ia v̾derbet mich ein kvmb̾·
dē ich niht entrinnē kā·
mich ſolde des wol genvͤgē·
ob ſich kvnde dc gefuͤgen·
dc ich froͤideloſer mā·
mich da vō v̾endē kvnde·
ob dv́ liebe mir deſ gvnde·
der ich lange her gedienet han·
ICh wil minē h̾zē mv̊tē·
dc es dvr die reinē gv̊tē·
noh ze froͤidē twīge ſich·
vō d̾ mīne ich bin betwūgē·
iſt mir da noh niht gelūge·
doch ſo froͤit gedīge mich·
vn̄ ir froͤide b̾ndes lachē·
mag mich ſoꝛgē ane machē·
in geſach nie wib ſo mīnenrich·
Was kā ſoꝛge bc v̾tribē·
dāne lon vō gv̊te wiben·
deſ kan ich erdenken niht·
ich weiſ wol dc hoh gemvͤte·
kvmt vō reiner wibe gvͤte·
deſ dv́ meiſte māge giht·
ſw̾ dc rehte welle bevīden·
d̾ ſol niht an ſtete erwīden·
ſeht dar vf habe ich mit froͤiden pfliht·