Vil svͤssú minne·
din suͤssekeit·
Hat mich getan
gar ane froͤideb̾nden mv̊t·
ich han die sinne·
vil stete breit·
an dich gelan·
war wie we mir dú liebe tůt·
wende frǒwe mine not·
ald ich bin an froͤiden tot·
schaffe dc mich troͤste der vil svͤssen mv́ndel rot·
Ich mv̊s beliben ân allen strit·
vil vndertan·
der ich gar eigenlichen bin·
min kan ver triben·
kein has noch nit·
hatz ieman wan·
der mv̊s dar an betrǒgen sin·
in wil mich von ir scheiden niht·
ist dc man mich in sorgen siht·
wc dar vmbe es kvmt noch das man mir froͤiden giht·
Heý svͤsser meýe·
din kvnft vns git·
I vil wunnen breit·
die man da heisset leit vertrib·
von dime geheie·
der ang̾ lit·
gar wol bespreit·
mit maniger hande blv̊men kib·
in den welden vber al·
waren die linden alle val·
da singet nv ir svͤssen stin me dú nahtegal·
Wil mich niht troͤsten·
mins herzen trost·
an der vil gar·
lit al mins libes zv̊versiht·
so lege mich roͤsten·
hin vf den rost·
vnd neme war·
dc mir nie wart so liebes niht·
in al der werlte sam ir lib·
genade helferiches wib·
mit diner gvͤte vs minen herzen swere trib·
Ja mv̊s verderben·
min sender lib·
dc ist ein not·
dc si des niht erkennen wil·
moͤhte ich erwerben·
dc noh ein wib·
fúr minen tot·
wolte bieten ir minne spil·
so wurde ich schiere wol gesunt·
vnd froͤite mich der selben stunt·
ich bitte got das er mir fuͤge den selben lieben fvnt·