Vil selic wart er ie geborn·
dem disú zit genedeklich zergat·
ân aller slahte senden zorn·
vnd er ein teil darvnder sines willen hat·
wie dem nahet manic wunneklicher tac·
wie lútzel er mir selic man gelǒben mac·
dc ich vf sorge bin verdaht·
vnd wirde ǒch niemer rehte fro·
mich hat ein lieb in truren braht·
dc ist vnwendig nv si also·
Das ich min leit so lange klage·
des spottent die den ir gemvͤte hohe stât·
wc ist in lieb dc ich in sage·
wc sprichet der von froͤiden der deheine hat·
wolde ich liegen sost mir wunders vil geschehen·
so truge aber ich mich an not solt ich des iehen·
wan lânt si mich erwerben dc·
danach ich ie mit trúwen ranc·
ste iemen danne ein lachen bas·
dc gelte ein ǒge vnd habe er doh danc·
Ich wil von ir niht ledig sin·
die wile ich iemer gernden mv̊t zer werlte han·
das beste gelt der froͤiden min·
dc lit an ir vnd aller miner selden wan·
swenne ich dc verlúse sone han ich niht·
vnd enrůche ǒch fúr den selben tac· swas mir geschiht·
ich mac wol sorgen vmb ir leben·
stirbet si so bin ich tot·
hat si mir anders niht gegeben·
so erkenne ich doch wol sende not·
Genade ist endeliche da·
dú erzeige sich ob es an ir genaden si·
ich versv̊che es niender anderswa·
von ir gebotte wil ich niemer werden fri·
dc si da sprechent von verlorner arbeit·
sol dc der miner einú sin dc ist mir leit·
ich wande niht do ich sin began·
ich gesehe an ir noch lieben tag·
ist mir da misselvngen an·
doch gab ichs wol als es do lac·