90v60¶ Van dantzen.
¶ Dat beste yn deme dantze ys datman
Nicht alle tyd vor sick hen derff gaen
Men datmen bytyden vmmekeren kan
Dar to moetmen eynen spelman han
5Ick holde oek de vor narren gantz
De froude vnde lust hebben yn deme dantz
Bestuuen oere been wente an den buek
Sprinck hyr vmme her vysteruck
Vnd maken yn allen winkelen stoff
10Der geckery wilt se hebben loff
91r250px
Eyn yslick merke / vnde wol betracht
De důuel hefft den dantz bedacht
Do he de yoeden reysede an.
Dat se dat kalff scholden beden an
15Dar se vmme dantzeden gode to hoen
Deme geliken noch alle dantzers doen
Se vortornen god yn sunden vyl
Dar ys homoet vnde ouerspyl
To reysinge der vnkůscheyt
20Affgoederye vnde alle ydelicheyt
Dar holt men Venus an de hende
Erbarheyt schemernheyt hefft dar eyn ende
Ick weeth nicht effte oek sy vp ertryk
Eyn schimp de sy deme ernst so gelyk
2591vAlzemen dantzet dar kyrckwyginge ys
Edder dar ys eyne erste myß
Dar dantzen papen moenneke vnde leyen
De kappe moet denne achter weyen.
Mit Kuntze vnde mit Metzen dantzen mach
30So hungert oen nicht den gantzen dach
Se werden des kopes den eyns to degen.
Wo men eynen bock gheue vmme eyne tzegen
Schal dat tydkoertinge sin genant
So hebbe yk narheyt vele erkant
35¶ Id ys gescheen yn deme Mayborgeschen sticht.
To Colbeke wart eyn dantz angericht
In deme hilgen auent Christus gebort
Eyn heel yaer dantzeden se yůmmer vort
Van .xv. frouwen vnde .xviij. manß
40Vp sunte magnus kerkhoff schach desse dantz
Id schach oek to Traiecten vp der mase
Etlike narrynnen vnde ander dwase
Dantzeden vp eyner brůggen seer fast
De brůgge brack entwey mit der hast
45Twey hundert minschen bleuen dar doet
Vordrůnken sus yn sere bitterer noet
Wente se sick nicht sere oek dar an keerden
Dat hilge sacrament nicht behoerliken erden
So de prester dat vor se ouer droech
50Des quam vp se dit grote vngeuoech
Wor de armen selen sint hen gebleuen
Dit wil wy gode deme heren geuen
Eyn dantz sprikt de hilge sunte Augustin
Mach des důuels processie genoemet syn
5592rBystu gerne yn edder by den dantz
So bistu ok yn des důuels processien heel vnde gantz