Tǒ mit vollen· aber trúfet·
vf die rosen ane tuft·
vsser bollen· schone slúfet·
manger losen bluͤte kluft·
dar in senkent· sich dú vogellin·
dú gedoͤne lut erklenkent·
dc vil schone· kan gesin·
Bi der wúnne· wol mit eren·
sol sich kleiden mannes lip·
dc im kvnne· froͤide meren·
ein bescheiden selig wib·
swer verschulden wibes minne sol·
der mv̊s ringen· nach ir hulden·
mit vil dingen· tugende vol·
Swer mit sinne· valsch kan vͤben·
als ein dieplich nach gebur·
der wil minne so betruͤben·
dc ir lieplich lon wirt svr·
wan sol zwischen· minne mit genvht·
trúwe in glanzer· stete mischen·
dc birt ganzer froͤiden fruht·