Swes mv̊t ze froͤiden ſi geſtalt·
der ſchǒwe an den vil gruͤnē walt·
wie wunneklich gekleidet·
der meie ſin ingeſinde hat·
vō richer varwe in liehter wat·
den vogelin truren leidet·
vſ hohē mv̊te mangen don gar rilich ſvͤſſe wiſe·
hoꝛt man von in lvten klanc·
voꝛ vs der nahtegalen ſanc·
vf grvͤneb̾ndem riſe·
Von ſchuldē mv̊s ich ſoꝛgē wol·
von froͤiden git min h̾ze zol·
die wile ir grůs mir wildet·
dú min h̾ze bi ir hat·
ach dc ſi mich in ſoꝛge lat·
got hat ſi ſo gebildet·
dc min h̾ze niht enkan noh al min ſin erdenkē·
wie ſi ſchoner kvnde ſin·
dv́ mīnekliche frǒwe min·
dv́ mir wil froͤide krenken·
Ach mīne ſuͤſſe ratgebin·
rât dc dv ſelig mvͤſſiſt ſin·
mins h̾zen kúnigīne·
rat dc ſi mir tů helfe ſchin·
rat dc ſi wende minen pin·
vn̄ mīneklichú minne·
ſit dv ſlos biſt vn̄ bant mins h̾zē vn̄ der ſinne·
ſo rât ia deſt an der zit·
min troſt min heil gar an dir lit·
in diner glůt ich bꝛinne·
Mv̊s ich nv ſcheidē ſvs vō ir·
dc ich ir hulde gar enbir·
owe der leiden verte·
die danne gegen púlle tv̊t min lib·
genade ſeldenriches wib·
wis gegē mir niht ſo h̾te·
ſenfte ein dinen mv̊t vn̄ ſpꝛich vſ dinem mvnde·
zv̊ mir niht wan eht fúnf woꝛt·
die hoͤhent miner froͤiden hoꝛt·
var hin ze gv̊ter ſtvnde·
In gv̊ter ſtvnde ſi din vart·
din lip din ſele ſi bewart·
din lob din heil din ere·
mac dich erwendē min gebot·
min vlen min drǒ dc weis wol got·
ſo wil ich bitten ſere·
ſit dc din vart vnwendig iſt ſo fuͤreſt zwei herze in arbeite·
dc mine vn̄ ǒch dine hin·
da von ich iemer trurig bin·
nv ſi kriſt din geleite·