Swer nimt ſchoner frowen·
durch ir wunne war·
der get dar·
g̾ne ſwa er ſi ſehen mag·
wan das ſuͤſſe ſchowen
in ſin herze gat·
ſůſſe inpfat
es doch ſenlichen ſlag·
ſwenne er ir wūnen inret ſich·
die ſo loſlich ſint vn̄ ſo wiblich gimeit·
dú ſuͤſſekeit·
ǒch dike wundet mich·
ER wirt wild̾ ſinne·
der wol kan enzſtan
wie wunneſan
doch ſchone frowen ſint·
vn̄ wirt wol der mīne·
wan manig frowe gůt·
zartlich tůt·
alſam ein zartes kīt·
wan ſi ſint ſo zartlich geſtalt·
ſo minnēkliche mir bihagt ir wunne bas·
danne alles das·
zer welte wunne iſt gezalt·
Swa mānes h̾ze mīnen
gert an ſelker ſtat·
dar er hat·
heinliche wol manig ſtunt·
d̾ mag lieb gewinnen·
heinliche tůt vil·
ob er wil·
ald im vf minne iſt kunt·
ſwāne er iſt ſiner frowen bi·
ſo klegt er ir ſin not ſenlich als er ſol·
der mag wol
ſēd̾ not werden fri·
Den ſin h̾ze twingit·
das er mīne ein wib·
d̾ ſin lib·
můs ſtete froͤmde ſin·
in not es in bꝛingit·
and̾s wirt im nicht·
ſam geſchicht·
mir gegen der frowen min·
wenne ſolte erbarmen ſi min not·
vn̄ ich ir nicht klagen mag ſende vngimach·
ach vn̄ ach·
des ſint min froͤide tot·
ICh enmag getrúwen·
leid̾ des nicht ir
das ſi mir·
noch gúnne heiles vunt·
doch wil mich nit rúwen·
dc ich diente ir ie·
ſwie mir nie·
kein troſt wart vō ir kunt·
wan ſi iſt ein frowe valſches fri·
wol giſtalt vil ſchone vn̄ da bi minnenklich·
ach ſolde ich·
ich ir tǒgen weſen bi·