Swas der ſvmer froͤiden bꝛinget·
das dien kleinē vogelin ſanfte tůt·
ſwaſ dú nahtegal geſinget·
doch ſo truret alles mir der mv̊t·
div mich twinget vn̄ ie twanc·
nach der ie min h̾ze ranc·
dú wil twīgen mich ze ſere·
dvr ere· ſinge ich núwē ſanc·
Wol mich dc ich han fvndē·
ein wib d̾ ich iemer dienen ſol·
in ir dienſt bī ich gebvndē·
ſi tv̊t mir ī minē ǒgē wol·
wolde mich ir roter mvnt·
kv́ſſen ſo w̾e ich geſvnt·
ſo lieſſe ich min vngemvͤte·
got ir hvͤte· dv́ mich hat v̾wunt·
Wolde mich dv́ mīnekliche·
niht v̾derben ſo wer wol an der zit·
dc ſi tete dem geliche·
wie ſi minē ſenden ſtrit·
ſcheidē wolt in kvrzer ſtunt·
mīne ſich ia bin ich wunt·
in wirde ane die helfe dine·
miner pine· niem̾ wol geſvnt·