Svmer hinnen kere· mit sere· sin ere· swachen wil·
heide vnd anger worden sint vil vngemeit·
walt von sinem kleide· mit leide· nv scheide· blv̊men vil·
siht man valwen in der liehten ǒwe breit·
leides wunder· wil dar vnder· vns besvnder· tv̊n der winter hoͤne·
kranc sint sine loͤne· vil schoͤne· gedoͤne· stillet er·
dc betruͤbet 385v maniges edeln herzen ger·
Swer nv fro belibe· von wibe· der tribe· truren hin·
vnd prise frowen fúr des meien blůt·
wib sint ane lǒgen· den ǒgen· vil tǒgen ein gewin·
der vil bas danne alle blv̊men drinne tůt·
wiblich trúten· kan betúten· liep den lúten· fúr der vogel schallen·
wib sint ane gallen· vns allen· enpfallen· sorge mv̊s·
durh der minneklichen reinen wibe grůs·
Ich wil minne grvͤssen· dú bvͤssen· ir svͤssen frúnde sol·
kvmber vnd seneliches vngemach·
minne mit ir stúre· gehúre· vil súre· svͤsset wol·
vnd machet herzeliebe truren swach·
wibes minne stoͤret sinne· mit gewinne· wil si froͤide meren·
minne dv́ mac leren· vil eren· ir seren· dienstman·
heilen si mit senfter arzenie kan·