Svmer hat geſendet vs ſin wunne·
ſecht die blůmen gent vf dur das gras·
luter clar ſtet nu der lichte ſunne·
d̾ den wint̾ e· vil truͤbe was·
ſchoͤn ǒgenweide
bꝛingt vns der meie er ſpꝛeit vf dú lāt ſin wat·
w̾e ich nicht in ſenelichem leide·
vf der heide·
wurde mir ſoꝛgen rat·
Der ich alle mine tage diente·
dú geſpꝛach noch nie zemir hadank·
das tůt mir als der min h̾ze pfriente·
owe ſi machet ſer min leben krank·
ich moͤchz irbarmen·
ich bin ſo v̾re komen in vil ſende not·
des můs ich in iamer dike erwarmen·
vn̄ ǒch armen·
bis vf minen tot·
ICh v̾ſůchte vō not an minem h̾zen·
ob es mechte ſich vō ir gekern·
da tet es mir kūt ſo ſi ſenden ſmerzen·
das es niem̾ mechte ſich ir erw̾n·
ich bin gebunden·
in ir ginade· wil ſi ſo wirde ich irloſt·
wil ab̾ ſi mir ſeren h̾zen wunden·
zallen ſtunden·
owe wa iſt ir troſt·