Steter dienest der ist gv̊t·
den man schonen frowen tůt·
als ich miner han getan·
der mv̊s ich den salamander bringen·
eines hat si mir gebotten·
dc ich schike ir abe den rotten·
hin provenz in das lant
zenv̊renberg· so mag mir wol gelingen·
vnd die tv̊nǒwe vber rin
fuͤge ich das so tv̊t si swes ich mv̊te·
spriche ich ia si sprichet nein·
svs so hellen wir en ein·
dank so habe dv́ frowen min
sist geheissen gv̊te·
heia hei sist ze lange gewesen vs miner hv̊te·
la húte vnd iemer mere ia·
heilalle vnd aber ia·
ziehent herze wafena·
wie tůt mir dú liebe so·
dv́ reine vnd dv́ vil gv̊te·
dc si mich niht machet fro·
des ist mir we ze mv̊te·
Mich froͤit noch bas ein lieber wan·
den ich von der schonen han·
so der mv́seberg zerge
sam der sne· so lonet mir dú reine·
alles des min herze gert·
des bin ich an ir gewert·
minen willen tůt si gar·
buwe ich ir ein hus von helfenbeine
swa si wil vf einen se·
so habe ich ir hulde frúntschaft vnd ir hulde·
bringe ich ir von galýle
her an alle schulde·
einen berk gefuͤge ich dc·
da her adan vffe sas·
heia hei dc were aller dienste ein vber gulde·
Ja húte vnd iemer ia·
heilalle vnd aber ia·
ziehent herze wafena·
wie tůt mir dú liebe so·
dv́ reine vnd dv́ vil gv̊te·
dc si mich niht machet fro·
des ist mir we ze mv̊te·
Ein bǒn stan in ýndian·
gros den wil si von mir han·
minen wille tůt si gar
seht ob ich irs alles her gewinne·
ich mv̊s gewinnen ir den gral·
des da pflag her parcýfal·
vnd den apfel den paris
gab dvr minne venvs der gúttine·
vnd den mantel der besloss
gar die frowen dú ist vnwandelben·
dannoch wil si wunder gros·
dc ist mir worden swere·
ir ist nach der arke we·
dú beslossen hat noe·
heia hei·
brehte ich die wie lieb ich danne were·
Ja húte vnd iemer ia·
heilalle vnd aber ia·
ziehent herze wafena·
wie tůt mir dú liebe so·
dv́ reine vnd dv́ vil gv̊te·
dc si mich niht machet fro·
des ist mir we ze mv̊te·