Singent vogel ſingent miner frowen der ich ſanc·
ich ſanc vmbe alle ir ere vn̄ vmbe ir werden frúndes lip·
den beidē dien ich gerne ir ſo dient ich ane danc·
das trvwe ich wol erwenden ſit ſich das wnder ſchone wip·
eines riters vn̄ ir erē hat bewegen·
ich pflag ir her nv mv̊ſſe ir got der riche pflegen·
vn̄ helf ime wol von hinnen er hat ze lange hie gelegen·
Jch zúge es vf der cleinen vogelline moꝛgen ſanc·
das ich dir han geleiſtet riter ſwas ich leiſten ſol·
dime libe vn̄ miner frowē her des mich min trúwe ie twanc·
daſt húte vn̄ iemer mere biſt bewacht vn̄ behuͤtet wol·
wan das ir zoꝛn gegen tage mir zwiuel git·
nv weke in frowe ich ſige im rehte ſcheidenſ zit·
nv huͤte din ſelbes riter gros angeſt bi der liebe lit·
Ich bin vnſanfte erweket frowe ob ich entſlafen was·
von manigem vogel ſange die ſich da froͤwent gegen dem tage·
ich hoꝛte lute ſingen den wahter vf dem palas·
als er vns hat beſcheiden mit ſange hoꝛte ich ſine clage·
wie haſtv ſelic wib mich das verdaget·
das dv niht ſpꝛeche riter wache ich wên es taget·
nv mv̊s ich von dir ſcheiden gros angeſt mich von liebe iaget·