Sich hat v̾wandelt dú zit· dc v̾ſten ich bi der vogel ſingen·
geſwigē ſint die nahtegal ſi hant gelan ir ſvͤſſes klingē·
vn̄ valwet oben der walt·
ie noh ſtet dc h̾ze min in ir gewalt·
der ich den ſvmer gedienet han·
dú iſt min froͤide vn̄ al min lieb ich wil irs niemer abe gegan·
Ich mv̊s vō rehten ſchulden hoh tragē dc herze vn̄ alle die ſinne·
ſit mich der allerbeſte man v̾holn in ſime h̾zen mīne·
er tůt mir grôſſer ſoꝛgē rat·
wie ſelten mich dú ſicherheit geruwē hat·
ich wil im iemer ſtete ſin·
er kan wol grôſſer arbeit gelonen nach dem willen min·
Ich bin ein bote her geſant frǒwe vf māge 65v dine guͤte·
ein ritter der dich hat erwelt vs al der w̾lte in ſin gemvͤte·
er hies dir klagen ſin vngemach·
dc er ein ſenendeſ h̾ze treit ſit er dich ſach·
im tůt ſin lāges beiten we·
nv reden wirs an ein ende enzit ê im ſin froͤide gar zerge·
Der got der al die welt geſchaffen hat der gebe der liebē noch die ſinne·
das ſi mich mit armē vmbevahe vn̄ mich vō rehten herzen minne·
mich dvnkent ander frǒwē gůt·
ich gewinne vō ir dekeiner niemer hohen mv̊t·
ſin welle genade enzit began·
dú ſich da ſv́ndet an mir vn̄ ich ir vil gedienet han·