Sich biderber man din gemvͤte heret·
swa ein wib dich minnekliche gruͤsset·
al din hoffenunge wirt gemeret·
frowen guͤte mannen kvmber bvͤsset·
ane minne ist nieman wert·
vnkúsche mag geminnen niht·
vnminne dv́ ist dem ein wiht·
der rehter minne gert·
Wie sol man bas gesprechen von der minne
nieman hat niht als rehte gv̊tes·
swer der pfliget der waltet gůter sinne·
minne tůt dem man niht arges mv̊tes·
swer der minne ist vndertan·
si lat in manige tvgende sehen·
als ich die wisen hoͤre iehen·
si leret sv́nde lan·
Ia wol dem der vnminne zallen stunden·
gerne flúhet den mag ere geren·
minne wart nie bi den súnden vunden·
si kan gv̊ten man wol rehte leren·
genv̊ge lúte sprechent so·
dc vnminne súnde si·
minne ist aller súnden fri·
seht minne machet vro·