Si gelichet sich der svnnen·
dú den sternen nimt ir schin·
die da vor so liehte brvnnen·
alsvs nimt dú frowe min·
allen wiben gar ir glast·
si sint doh dest vnschoͤner niht·
ere ist ir si ist niht ir gast·
alle tvgent si gar zúndet·
dc der werlte vroͤide kv́ndet·
da von man ir prises giht·
Do min wilder mv̊t vil tǒgen·
streich nach froͤide in ellú lant·
do lvchten ir liehten ǒgen·
er vůr dar da von si in bant·
mit ir steten wibes zuht·
ich viel mit ir in den strik·
wir han von ir keine fluht·
wir han aber den gedingen·
dc ir spilnden ǒgen swingen·
vnd vns werfen einen blick·
112r Do min mv̊t sit wolde vliegen·
als ein valke in froͤiden gir·
so moht er si niht betriegen·
er mvͤse aber wider zir·
von der er verstoln flǒg·
er forhte si neme es war·
ob er si mit wandel trǒg·
vnd er anders wolde denken·
do duhte in si solde wenken·
also swang er wider dar·