Si fragent mich·
war mir si komen·
min sanc des ich e wilent pflac·
si mvͤgent sich·
est vnvernomen·
warvmbe ich nv niht singen mac·
noch were mir ein kvnst bereit·
wan dc mir ein sendes herzeleit·
twinget dc ich swigen mv̊s·
des mir vnsanfte wirdet bůs·
Kvnde ich klagen·
min herzeleit·
gelich als mir nahe gat·
so wolde ich sagen·
vf minen eit·
dc nieman grossern kvmber hat·
noch niene wart so truric man·
dc verswige ich als ich wol kan·
vnd klage es den gedanken min·
die lasse ich mit vn mvͤssig sin·
Ze der werlte ist wib·
ein froͤide gros·
bi den so mv̊s man hie genesen·
doch es minen lip·
noch nie verdros·
min herze dc ist in bi gewesen·
ich hete ie ze der werlte mv̊t·
vnd dc min mvnt in iemer sprichet gv̊t·
die trúwe lat nv werden schin·
belibe ich so gedenkent min·