Si darf mich des zihen niht·
min herze hete si in pfliht·
des mohte si die warheit an mir sehen·
vnd wil sis iehen·
ich kom sin dike in so grosse not·
dc ich den lúten gv̊ten morgen bot·
engegen der naht·
ich was so verre an si verdaht·
dc ich mich vnder wilent niht versan·
vnd swer mich grůste dc ich sin niht verstan·
Min herze vnsanfte sinen strit·
lat den es nv menge zit·
hat wider dc allerbeste wib·
der ie min lip·
mv̊s dienen swar ich iemer var·
ich bin ir holt swenne ich vor gotte getar·
so gedenke ich ir·
dc gerůche ǒch er vergeben mir·
ob ich des sv́nde svle han·
zwú geschv̊f er si so rehte wol getan·
Mit grossen sorgen hat min lip·
gerungen alles vmb ein wib·
ich het ein leben dc mir vil nahe gie·
dc verlie mich nie·
an wisheit kerte ich minen mv̊t·
dc wc dú minne dú noch mengem tůt·
die selben klage·
darvmbe ich niht an got verzage·
der kan den lúten helfen vs der not·
nieman weis wie nahe ime ist der tot·
Miner frowen wc ich vndertan·
dú ane lon minen dienst nan·
von der spriche ich niht wan alles gv̊t·
wan dc ir mv̊t·
wider mich ze vnmilte ist gewesen·
vor aller not do wande ich sin genesen·
do sich verlie·
min herze vf genade an sie·
der ich da leider fvnden niene han·
nv wil ich dienen dem der lonen kan·
Ich kom von minne in kumber gros·
des ich doch selten ie genos·
swas schaden ich da von gewunnen han·
so gefriesch nieman·
dc ich ir iht spreche wan gůt·
noh min mvnt von frowen niemer getůt·
doch klage ich dc·
dc ich so lange gotes vergas·
vnd wil es iemer vor allen dingen klagen·
vnd im darnach ein holdes herze tragen·