OWe das ich ſi îe geſach·
dú mir das herze hat betwungen·
von der ſo lide ich vngemach·
der ich dike han geſvngen·
des ſol ſi mich geniêſſen lan·
Wil ſi trúwe an mir erzeigen·
ich was ir ie vil vndertan·
vn̄ búte mich der vil ſchonen ze eigen·
OWe das ich nv ſcheiden ſol·
von liebe daſt gros vngevelle·
das ſcheiden tv̊t mir niht ze wol·
wem laſtv mich trut geſelle·
ſo we der iamerlichen not·
das wir vns lebendic mv̊ſſen ſcheiden·
nv kvm vil grimmeclicher tot·
vn̄ rihte gote von vns beiden·
Do ich dem babſte des veriach·
vn̄ aller miner miſſetete·
vn̄ er an minē bꝛieve ſach·
ich minne ein wib mit ganzer ſtete·
âne wandel iſt ir lib·
got der was vil ſenftes mv̊tes·
do er geſchv̊f ſo reine ein wib·
in geſach nie niht ſo gv̊tes·